ጸላም ዑንቍ፡ ኣብ ጸልማት እትደምቕ
ሕቖይ ዝሃብኩኺ፡ ካብ ጸልማት ክርሕቕ
ወርትግ ተዓኒደ፡ ንኣኺ ዝናፍቕ
ኣብ ብርሃን ዝደልየክስ፡ ክንደይ ኮን እሓምቕ!
ዘይቃዶ ግብሪ፡ ዘይገሃድ ሕልሚ
ንዘይረዊ ጽምኢ እነኹ እጸምኣኪ፡
ጸልማት ብዘርዓዶ፡ መቕባሕብሒ መንፈስ
ኣብ ዘይትርከብሉ ንምርካብኪ እቃለስ።
ጸላም ዕንባባይ፡ ቡቝሊ ጸሊም ሓመድ
ብርሃን ዘይጣኦታ፡ ምስ ጸልማት እትዛመድ
ከም ነብስኻ ምዃን፡ ንነብስኻ ምምሳል
ተወሃሂድክዮ ኣብ ዓለምካ ምንባር!
ግርማ ኣለዎ ጸልማት፡ እቲ መጃጀዊ
ምስ ሓቘፈኪ’ውን፡ ዝያዳ ግርማዊ።
ጸላም ዕንባባይ፡ ኣንቲ ጸላም መርዓት
ክሳዕ መኣስ’የ ግን ክሕጸብ ብንብዓት
ንጸልማት ክደፍሮስ ምቐልኒ ትብዓት፡፡
Join the conversation